बुलढाणा एलसीबीची मोठी कारवाई; 5.78 लाखांचा प्रतिबंधित गुटखा व वाहन जप्त

बुलडाणा समाचार 

बुलढाणा,  : महाराष्ट्र शासनाने बंदी घातलेल्या गुटखा व सुगंधित पान मसाल्याच्या अवैध व्यापाराविरोधात बुलढाणा स्थानिक गुन्हे शाखेने (एलसीबी) मोठी कारवाई करत 5 लाख 78 हजार 900 रुपयांचा मुद्देमाल जप्त केला आहे. या प्रकरणी एका आरोपीला ताब्यात घेण्यात आले आहे.

मिळालेल्या गुप्त माहितीनुसार, एक व्यक्ती आपल्या मारुती सुजुकी स्विफ्ट डिझायर (एमएच-28-ईटी-5300) या कारमधून विक्रीसाठी प्रतिबंधित गुटखा व सुगंधित पान मसाला घेऊन जात असल्याची माहिती स्थानिक गुन्हे शाखेला मिळाली होती. त्यानुसार पोलिसांनी देवलघाट परिसरात सापळा रचून संबंधित वाहन अडवले.

वाहनाची झडती घेतली असता मोठ्या प्रमाणात प्रतिबंधित गुटखा व पान मसाला आढळून आला. पोलिसांनी तत्काळ कारसह संपूर्ण माल जप्त केला. या कारवाईत रौफ सलीम रौफ इस्माईल (वय 59) याला ताब्यात घेण्यात आले आहे.

आरोपीविरुद्ध भारतीय न्याय संहिता तसेच अन्न सुरक्षा व मानके अधिनियम, 2006 अंतर्गत विविध कलमांनुसार गुन्हा दाखल करण्यात आला आहे. जप्त करण्यात आलेल्या मुद्देमालामध्ये 3 लाख 28 हजार 900 रुपयांचा प्रतिबंधित गुटखा व पान मसाला तसेच 2 लाख 50 हजार रुपयांची स्विफ्ट डिझायर कार यांचा समावेश आहे.

ही कारवाई पोलीस अधीक्षक, बुलढाणा यांच्या मार्गदर्शनाखाली स्थानिक गुन्हे शाखेचे पोलीस निरीक्षक आशिष रोही यांच्या नेतृत्वाखाली करण्यात आली. पुढील तपास बुलढाणा ग्रामीण पोलीस करत आहेत.

गुटखा विक्रीवर बंदी; तरीही खुलेआम विक्री सुरू

बुलढाणा जिल्ह्यात गुटखा विक्रीवर बंदी असतानाही शहर, तालुका आणि ग्रामीण भागात गुटखा सहज उपलब्ध होत असल्याचे चित्र आहे. पानटपऱ्या व किराणा दुकानांमधून खुलेआम विक्री होत असल्याने युवकांच्या आरोग्याचा प्रश्न गंभीर बनला आहे.

पोलिसांकडून अधूनमधून कारवाया होत असल्या तरी मोठे पुरवठादार आणि तस्करीचे जाळे यांच्यावर प्रभावी कारवाई होत नसल्याने हा अवैध व्यवसाय सुरूच असल्याची चर्चा नागरिकांमध्ये आहे. त्यामुळे गुटखा माफियांवर व्यापक आणि कठोर कारवाई कधी होणार, असा प्रश्न उपस्थित केला जात आहे.

जप्त मुद्देमाल मुद्देमाल किंमत

प्रतिबंधित गुटखा व पान मसाला ₹3,28,900

स्विफ्ट डिझायर कार ₹2,50,000

एकूण जप्ती ₹5,78,900