बुलढाणा पोलीस भरती प्रक्रियेत उमेदवारांच्या सोयीसाठी प्रशासन सज्ज; निवासासह आरोग्याचीही विशेष काळजी!
बुलढाणा जिल्ह्यात सध्या पोलीस भरतीचा रणसंग्राम सुरू आहे. या प्रक्रियेत सहभागी होणाऱ्या शेकडो उमेदवारांना कोणत्याही अडचणीचा सामना करावा लागू नये, यासाठी जिल्हा पोलीस अधीक्षक श्री. निलेश तांबे यांच्या मार्गदर्शनाखाली प्रशासन पूर्णपणे सतर्क झाले आहे. राहण्याची सोय असो किंवा आरोग्याचा प्रश्न, भरती प्रक्रियेत पारदर्शकता आणि सुविधा यावर विशेष भर दिला जात आहे. पाहूया यावरचा एक विशेष रिपोर्ट.
बुलढाणा जिल्हा पोलीस आस्थापनेवरील १४८ पोलीस शिपाई आणि १४ चालक पोलीस शिपाई अशा एकूण १६२ पदांसाठी भरती प्रक्रिया १२ फेब्रुवारी २०२६ पासून सुरू झाली आहे. पोलीस कवायत मैदान येथे शारीरिक मोजमाप आणि मैदानी चाचण्या घेतल्या जात आहेत.
उमेदवारांना या भरती प्रक्रियेदरम्यान कोणतीही शारीरिक अडचण येऊ नये, म्हणून मैदानावरच वैद्यकीय अधिकारी, सुसज्ज रुग्णवाहिका आणि औषधांची सोय करण्यात आली आहे. विशेष म्हणजे कडाक्याच्या उन्हात उमेदवारांना थकवा जाणवू नये यासाठी ORS पाकिटे, अल्पोपहार आणि शुद्ध पिण्याच्या पाण्याची चोख व्यवस्था करण्यात आली आहे.
फोटो विसरलेल्यांसाठी रंगीत फोटो आणि कागदपत्रांच्या झेरॉक्सची सोय.
संपूर्ण भरती प्रक्रियेचे व्हिडिओ रेकॉर्डिंग आणि निकाल त्वरित जाहीर करण्याची सोय.
काही अडचण असल्यास मैदानावरच तक्रार निवारण कक्ष उपलब्ध.
भरती प्रक्रियेत पारदर्शकता राखण्यासाठी डिजिटल आणि ऑटोमेटेड पद्धतीचा वापर केला जात आहे. जर कोणी भ्रष्टाचाराचे आमिष दाखवत असेल, तर तातडीने पोलीस नियंत्रण कक्ष किंवा लाचलुचपत प्रतिबंधक विभागाशी संपर्क साधण्याचे आवाहनही पोलीस प्रशासनाकडून करण्यात आले आहे.
या संपूर्ण प्रक्रियेसाठी अतिरिक्त पोलीस अधीक्षक श्री. श्रेणीक लोढा आणि श्री. अमोल गायकवाड यांच्यासह १५ पोलीस निरीक्षक आणि ४२१ पोलीस अंमलदारांचा मोठा बंदोबस्त तैनात करण्यात आला आहे.
थोडक्यात सांगायचे तर, बुलढाणा पोलीस प्रशासनाने केवळ ‘खाकी’ची भरतीच नाही, तर माणुसकीचे दर्शन घडवत उमेदवारांसाठी उत्तम सोयीसुविधांचे नियोजन केले आहे. यामुळे उमेदवारांनी प्रशासनाचे आभार मानले आहेत.
