बुलढाणा नगरपालिकेत तीन स्वीकृत नगरसेवकांची बिनविरोध निवड
. बुलडाणा समाचार
बुलढाणा, ९ जानेवारी :
बुलढाणा नगरपालिकेतील तीन स्वीकृत नगरसेवकांची निवड बिनविरोध करण्यात आली आहे. यामध्ये उदय देशपांडे, प्रा. सुनील सपकाळ आणि मोहन पहाड यांचा समावेश आहे.
बुलढाणा नगरपालिकेसाठी २ डिसेंबर रोजी मतदान झाले होते. २१ डिसेंबर रोजी झालेल्या मतमोजणीत शिवसेनेच्या पुजाताई संजय गायकवाड यांची नगराध्यक्षपदी निवड झाली. आमदार संजय गायकवाड यांच्या नेतृत्वाखाली शिवसेनेने २२ नगरसेवक निवडून आणत बुलढाणा नगरपालिकेत ऐतिहासिक यश संपादन केले.
राज्य युवासेना कार्यकारणी सदस्य कुणाल संजय गायकवाड यांची बुलढाणा नगरपालिकेच्या गटनेतेपदी निवड करण्यात आली आहे. नगराध्यक्षांचे एक मत धरून त्यांना एकूण ३० नगरसेवकांचा पाठिंबा मिळाला आहे.
स्वीकृत नगरसेवकांसाठी नामांकन दाखल करण्याचा आज शेवटचा दिवस होता. मात्र काँग्रेस, राष्ट्रवादी काँग्रेस (अजित पवार गट), राष्ट्रवादी काँग्रेस (शरदचंद्र पवार गट) तसेच शिवसेना (उद्धव बाळासाहेब ठाकरे गट) यांच्याकडे आवश्यक संख्याबळ नसल्याने कोणत्याही पक्षाकडून अर्ज दाखल करण्यात आले नाहीत. परिणामी शिवसेनेच्या तिन्ही उमेदवारांची बिनविरोध निवड झाली.
आमदार संजय गायकवाड यांनी पक्षातील कार्यकर्त्यांना योग्य संधी दिल्याची भावना व्यक्त होत असून, या निवडीमुळे बुलढाणा नगरपालिकेत शिवसेना गटाचे संख्याबळ आता ३३ वर पोहोचले आहे.
